امریکی صدر کی سرکاری رہائش گاہ وائٹ ہاؤس کے باہر فائرنگ کا واقعہ پیش آیا ہے۔ سیکریٹ سروس نے فائرنگ کرنیوالے شخص کو ہلاک کر دیا۔
امریکی میڈیا کے مطابق فائرنگ 17 اسٹریٹ اور پینسلوینیا ایونیو کے قریب ہوئی، یہ فائرنگ ایسے وقت کی گئی جب صدر ٹرمپ وائٹ ہاؤس میں تھے۔
اے بی سی نیوز کی خاتون صحافی امریکا ایران مجوزہ معاہدے پر لائیو رپورٹنگ کررہی تھی جس وقت یہ فائرنگ کا واقعہ پیش آیا۔
فائرنگ بڑھی تو صحافی خوفزدہ ہوئی اور خود کو محفوظ مقام پرمنتقل کرنے کی کوشش کرتی نظر آئی۔
روسی میڈیا کے مطابق گولیاں چلانے کی درجنوں آوازیں سنی گئی ہیں۔ یہ معلوم نہیں ہوسکا کہ فائرنگ کیوں کی گئی اور کس نے فائرنگ کی۔
کئی صحافیوں کا کہنا ہے کہ وائٹ ہاؤس کے باہر 30 گولیاں چلائی گئیں، فائرنگ کے بعد وائٹ ہاؤس کو فوری طور پر لاک ڈاؤن کردیا گیا۔
امریکی میڈیا کے مطابق اسنائپرز کو وائٹ ہاؤس کی چھت پر تعینات کردیا گیا ہے۔
بعض رپورٹس کے مطابق سیکریٹ سروس کے اہلکاروں نے نارتھ لان میں جمع صحافیوں سے کہا ہے کہ وہ پریس بریفنگ روم میں چلے جائیں جبکہ صدر ٹرمپ کو محفوظ مقام پر منتقل کر دیا گیا ہے۔
