چین کے ایک الٹرا میراتھن رنر نے مسلسل 100 دن تک روزانہ 100 کلو میٹر دوڑ کر ایک غیر معمولی عالمی ریکارڈ قائم کر لیا۔
اس دوران انہوں نے مجموعی طور پر 10 ہزار کلومیٹر کا فاصلہ طے کیا اور بین الاقوامی سطح پر توجہ حاصل کی۔
رپورٹس کے مطابق ہوانگ ژینگ لونگ جو لانگ شاؤ کے نام سے بھی جانے جاتے ہیں، انہوں نے یہ فاصلہ 6 دسمبر 2025ء سے 15 مارچ 2026ء کے درمیان جنوبی چین کے شہر فوشان میں مکمل کیا۔
اس کارنامے کو حالیہ برسوں میں طویل فاصلے کی دوڑ کے سب سے مشکل چیلنجز میں سے ایک قرار دیا جا رہا ہے۔
مسلسل 100 دن تک روزانہ 100 کلو میٹر دوڑنا ایک ایسا چیلنج سمجھا جاتا ہے جو عام انسانی برداشت سے کہیں بڑھ کر ہے، یہی وجہ ہے کہ یہ کامیابی انہیں گنیز ورلڈ ریکارڈز میں شمولیت کے لیے مضبوط امیدوار بناتی ہے۔
ہوانگ ژینگ لونگ نے اس کوشش کی تیاری کا آغاز کووڈ 19 کی وباء کے دوران کیا اور بعد ازاں مکمل توجہ تربیت پر مرکوز کرنے کے لیے اپنا کاروبار بھی بند کر دیا۔
میڈیا رپورٹس کے مطابق انہوں نے ریکارڈ کی اس کوشش سے قبل ایک سال تک چین بھر میں روزانہ دوڑ لگانے کی مشق جاری رکھی۔
انہوں نے ایک منظم تربیتی نظام اپنایا، جس میں روزانہ کی دوڑ کے فاصلے کو بتدریج بڑھاتے ہوئے اپنی جسمانی برداشت کو بہتر بنایا۔
ان کی تیاری میں خوراک، ریکوری اور کارکردگی کی مسلسل نگرانی شامل تھی تاکہ وہ جسمانی دباؤ کی انتہائی سطح کو برداشت کر سکیں۔
100 روزہ چیلنج کے دوران انہیں ایک پیشہ ور ٹیم کی معاونت حاصل رہی، جس میں طبی ماہرین اور ماہر غذائیت شامل تھے، جو ان کی صحت کی مسلسل نگرانی کرتے رہے تاکہ وہ اس سخت مرحلے کو محفوظ طریقے سے مکمل کر سکیں۔
