پاکستانی یوٹیوبر رجب بٹ اپنے بیٹے کیوان سلطان بٹ کے 7 ماہ مکمل ہونے کی خوشی منانے پر ایک بار پھر سوشل میڈیا پر تنقید کی زد میں آ گئے۔
رجب بٹ کے یوٹیوب پر لاکھوں سبسکرائبرز اور انسٹاگرام پر بڑی فالوونگ موجود ہے، انہوں نے اپنے ڈیلی ولاگ میں بیٹے کی 7 ماہ کی سالگرہ منانے کی ویڈیو شیئر کی ہے، اس موقع پر انہوں نے 7 کیک کاٹے، جن پر بیٹے کے لیے مختلف پیغامات درج تھے۔
رجب بٹ کا کہنا ہے کہ میں یہ ویڈیو سوشل میڈیا پر شیئر نہیں کرنا چاہتا تھا، لیکن مداحوں کی خاطر ایسا کیا۔
انہوں نے کہا کہ میرا بیٹا تیزی سے بڑا ہو رہا ہے اور اس خوشی کو منانا ضروری تھا، جبکہ مجھے اپنی آن لائن شہرت یا تنقید کی پرواہ نہیں۔
تاہم سوشل میڈیا صارفین نے اس عمل کو شدید تنقید کا نشانہ بنایا، خاص طور پر ان کی سابق اہلیہ ایمان سے علیحدگی کے تناظر میں۔
ایک صارف نے لکھا کہ ماں سے علیحدگی کے بعد ایسی تقریبات کا کوئی فائدہ نہیں، جبکہ دوسرے نے کہا ہے کہ یہ بیٹے کی نہیں بلکہ کنٹینٹ کی 7 ماہ کی سیلیبریشن ہے۔
کچھ صارفین نے یہ بھی مؤقف اختیار کیا کہ اگر رجب بٹ واقعی اپنے بیٹے سے محبت کرتے ہیں تو انہیں اپنے گھریلو معاملات بہتر بنانے پر توجہ دینی چاہیے۔
رجب بٹ کی اس ویڈیو کے بعد ایک بار پھر سوشل میڈیا پر بحث چھڑ گئی ہے، جہاں کچھ افراد ان کی حمایت کر رہے ہیں تو اکثر صارفین ان پر تنقید کرتے دکھائی دے رہے ہیں۔
