سیکیورٹی فورسز نے خیبر پختونخوا میں انٹیلی جنس بیسڈ آپریشنز کے دوران بھارتی سرپرستی یافتہ فتنہ الخوارج کے مزید 23 خوارج کو ہلاک کردیا۔
پاک فوج کے شعبہ تعلقات عامہ آئی ایس پی آر کے مطابق سیکیورٹی فورسز نے گزشتہ 48 گھنٹوں کے دوران خوارج کے متعدد ٹھکانوں کو مؤثر انداز میں نشانہ بنایا ہے۔
آئی ایس پی آر کے مطابق ہلاک خوارج میں خارجی سرغنہ جان میر عرف طور ثاقب بھی شامل ہے۔ جو سیکیورٹی فورسز کو انتہائی مطلوب تھا۔ وہ دہشت گردی کی متعدد کارروائیوں، سیکیورٹی اہلکاروں اور معصوم شہریوں کے قتل میں ملوث تھا۔ حکومت نے خوارج سرغنہ کے سر کی قیمت مقرر کر رکھی تھی۔
پاک فوج کے شعبہ تعلقات عامہ کے مطابق ہلاک خوارج سے اسلحہ، گولہ بارود، بھاری مقدار میں دھماکہ خیز مواد اور آئی ای ڈیز بھی برآمد ہوئی ہیں۔ خوارج کے زیر استعمال زیرِ زمین سرنگوں اور بنکروں کے ایک پیچیدہ نیٹ ورک کو بھی تباہ کر دیا گیا۔
آئی ایس پی آر کا کہنا ہے کہ آپریشنز کو دتہ خیل، اسپن وام اور بنوں سمیت مختلف حساس علاقوں تک مزید توسیع دی گئی۔ اس کارروائی سے ان علاقوں میں سرگرم خوارج نیٹ ورکس کو بڑا دھچکا پہنچا ہے۔
آئی ایس پی آر کے مطابق دہشت گردی کے خلاف کارروائیاں پوری قوت سے جاری رہیں گی۔
