امریکا میں ایران جنگ کے معاملے پر سیاسی کشیدگی میں اضافہ ہو گیا، ڈیموکریٹ رہنما اور سینیٹر چک شومر نے صدر ڈونلڈ ٹرمپ کو شدید تنقید کا نشانہ بناتے ہوئے جنگ کو غیر قانونی اور مہنگی قرار دے دیا۔
سوشل میڈیا پلیٹ فارم ایکس پر اپنے بیان میں سینیٹر چک شومر نے کہا کہ ٹرمپ امریکی عوام کو بغیر کسی واضح مقصد اور حکمتِ عملی کے ایک غیر قانونی جنگ میں دھکیل رہے ہیں۔
انہوں نے اعلان کیا کہ ڈیموکریٹس اس ہفتے وار پاورز ریزولوشن پر ساتویں بار ووٹنگ کرائیں گے تاکہ ایران کے خلاف کارروائیوں سے امریکی فوج کو واپس بلایا جا سکے۔
اپنے بیان میں شومر نے کہا کہ مہنگائی اور موجودہ افراتفری ختم کرنے کا بہترین طریقہ اس غیر قانونی جنگ کا خاتمہ ہے، اگر ریپبلکنز نے ہماری قرارداد کی مخالفت کی تو وہ ٹرمپ کی جنگ کی ذمے داری بھی اٹھائیں گے۔
واضح رہے کہ امریکی قانون کے تحت وار پاورز ریزولوشن صدر کو کانگریس کی منظوری کے بغیر طویل جنگ جاری رکھنے سے روکنے کے لیے بنایا گیا تھا، جس کے مطابق 60 روز بعد کانگریس کی اجازت ضروری ہوتی ہے۔
ڈیموکریٹس کی جانب سے اس قرارداد کو کئی بار منظور کرانے کی کوششیں ناکام رہی ہیں کیونکہ کانگریس میں ریپبلکنز اکثریت میں ہیں اور ووٹنگ اکثر جماعتی بنیادوں پر تقسیم ہو جاتی ہے۔
