پاکستانی اداکارہ میرا نے حالیہ انٹرویو میں بھارتی فلم ساز مہیش بھٹ اور اداکارہ عالیہ بھٹ کے ساتھ اپنے قریبی تعلقات کے بارے میں انکشاف کیا ہے۔
میرا نے بتایا ہے کہ میں نے بھارتی فلم ’نظر‘ میں مہیش بھٹ کے ساتھ کام کیا تھا اور اس دوران میری بھٹ فیملی کے ساتھ قریبی دوستی رہی ہے۔
ان کے مطابق میں بھارت میں اپنے قیام کے دوران مہیش بھٹ کے گھر بھی ٹھہری تھی اور ان کے خاندان کے ساتھ وقت گزارا تھا۔
اداکارہ نے کہا کہ میری آنے والی فلم ’سائیکو‘ بھارت میں ریلیز نہیں ہو رہی، جس پر مجھے افسوس ہے کیونکہ میرے خیال میں مہیش بھٹ اور ان کی اہلیہ یہ فلم ضرور دیکھتے اور پسند کرتے۔
میرا نے انکشاف کیا ہے کہ جب میں بھارت میں کام کر رہی تھی تو اس وقت عالیہ بھٹ بہت چھوٹی تھیں، اس دور میں عالیہ اور بھٹ فیملی کے ساتھ میرے دوستانہ تعلقات تھے۔
اداکارہ کے یہ بیانات ایک بار پھر سوشل میڈیا پر زیرِ بحث آ گئے ہیں، جہاں صارفین ان کے پرانے اور نئے انکشافات پر مختلف ردِعمل دے رہے ہیں۔
