پنجاب کے تعلیمی اداروں میں موسم گرما کی تین ماہ کی چھٹیاں دینے کا اقدام لاہور ہائیکورٹ میں چیلنج کردیا گیا۔
آل پاکستان پرائیوٹ اسکولز ایسوسی ایشن نے ہائیکورٹ میں درخواست دائر کی ہے، جسٹس خالد اسحاق اس درخواست پر کل سماعت کریں گے۔
درخواست میں پنجاب حکومت، محکمہ اسکولز ایجوکیشن اور دیگر کو فریق بنایا گیا ہے جس میں موقف اپنایا گیا ہے کہ پنجاب حکومت نے تین ماہ کی موسم گرما کی تعیطلات کا نوٹیفیکشن جاری کیا۔
اس میں یہ بھی کہا گیا کہ پاکستان میں تعلیمی سال کم ہو کر 120 دن کا رہ گیا ہے۔ امریکا، انگلینڈ سمیت دیگر ممالک میں تعلیمی سال 230 دن کا ہے، تین ماہ تعلیمی ادارے بند کرنے سے طلبہ کی پڑھائی متاثر ہوگی۔
درخواست میں استدعا کی گئی کہ عدالت 3 ماہ تک تعلیمی ادارے بند کرنے کا نوٹیفکیشن کالعدم قرار دیتے ہوئے تعلیمی اداروں میں موسم گرما کی تعطیلات 6 سے 8 ہفتے کرنے کا حکم دے۔
