7 فٹ لمبا مگرمچھ شاہراہ عبور کرتے ہوئے پکڑا گیا

امریکی ریاست فلوریڈا میں ایک 7 فٹ لمبے مگرمچھ کو مصروف شاہراہ عبور کرنے کی کوشش کرتے ہوئے پکڑ کر اس کے ماحول میں منتقل کر دیا گیا۔

اس حوالے سے بتایا جاتا ہے کہ فلوریڈا کے ہلز بورو کاؤنٹی میں شیرف (پولیس) کے اہلکاروں نے اس لمبے مگرمچھ کو اس وقت قابو کیا جب وہ ایک مصروف ہائی وے عبور کرنے کی کوشش کر رہا تھا۔

کاؤنٹی شیرف آفس نے سوشل میڈیا پر بتایا کہ جب مگرمچھ کو نارتھ ڈیل میبری ہائی وے پار کرنے کی کوشش کرتے دیکھا گیا تو اہلکار ایک لائسنس یافتہ ٹریپر کے ساتھ موقع پر پہنچے۔

پوسٹ میں پرمزاح انداز میں بتایا گیا کہ جب آپ کا ’ملزم‘ 7 فٹ لمبا ہو اور اس کے پاس 80 انتہائی تیز دانت ہوں تو آپ بیک اپ بلاتے ہیں۔ 

شیرف آفس کے مطابق مگرمچھ کی سڑک پار کرنے کی کوشش کو محفوظ طریقے سے روک کر اسے آبی و جنگلی ماحول میں منتقل کر دیا گیا۔