پاکستان سپر لیگ (پی ایس ایل) الیون فائنل سے قبل قذافی اسٹیڈیم میں ایک شاندار اختتامی تقریب منعقد ہوگی جس میں معروف گلوکار پرفارم کریں گے اور آتش بازی کا شاندار مظاہرہ بھی کیا جائے گا۔
سی ای او پی ایس ایل سلمان نصیر نے کرکٹ شائقین کے لیے پیغام میں کہا کہ اختتامی تقریب میں معروف گلوکار اپنی پرفارمنس سے شائقین کو محظوظ کریں گے، رنگارنگ تقریب کے دوران آتش بازی کا شاندار مظاہرہ بھی کیا جائے گا۔
سلمان نصیر نے کہا کہ شائقین اختتامی تقریب سے لطف اندوز ہونے کے لیے شام 6 بجے تک لازمی اپنی نشستیں سنبھال لیں۔ فائنل میچ کے باعث سڑکوں پر رش متوقع ہے لہٰذا شائقین گھروں سے جلد روانہ ہوں۔
سی ای او پی ایس ایل نے کہا کہ شائقین کی سہولت کے لیے قذافی اسٹیڈیم کے لبرٹی گیٹ اور فیروزپور روڈ گیٹ پر اضافی انٹری پوائنٹس قائم کیے گئے ہیں۔
خیال رہے کہ پی ایس ایل 11 کا فائنل کل حیدرآباد کنگزمین اور پشاور زلمی کے درمیان کھیلا جائے گا۔
