چین کے شہر ثانیہ میں جاری ایشین بیچ گیمز میں ریسلنگ کے مقابلوں میں پاکستان کے پہلوانوں کی کارکردگی شاندار رہی، دو میڈلز یقینی ہوگئے۔ انعام بٹ اور اسداللہ فائنل میں پہنچ گئے۔
ایشین بیچ گیمز میں پاکستان ریسلنگ ٹیم نے شاندار کارکردگی کا مظاہرہ کیا ہے اور 80 کلو گرام کیٹیگری میں اسد اللہ نے کوارٹر فائنل میں روایتی حریف بھارت جبکہ سیمی فائنل میں میزبان چین کے پہلوان کو زیر کرتے ہوئے فائنل کے لیے کوالیفائی کیا۔
90 کلو گرام کیٹیگری میں انعام بٹ نے کوارٹر فائنل میں بحرین جبکہ سیمی فائنل میں منگولیا کے حریف کو ہرا کر فائنل میں رسائی حاصل کر لی، فائنل میں دونوں پہلوانوں کا مقابلہ ایرانی حریفوں سے ہوگا۔
دوسری جانب 70 کلو گرام کیٹیگری میں محمد عبداللہ کو سیمی فائنل میں بھارتی پہلوان سے شکست کا سامنا کرنا پڑا۔ محمد عبداللہ برانز میڈل کے لیے کرغزستان کے پہلوان کے خلاف میدان میں اتریں گے۔
پاکستان ریسلنگ فیڈریشن کے سیکریٹری انعام بٹ نے پہلوانوں کی شاندار کارکردگی پر خوشی کا اظہار کرتے ہوئے قوم سے پہلوانوں کی فائنل میں کامیابی کے لیے دعاؤں کی درخواست کی۔
