پاکستان پیپلز پارٹی (پی پی پی) کے چیئرمین بلاول بھٹو زرداری سے رکن قومی اسمبلی قادر پٹیل نے ملاقات کی اور بحری قزاقوں کی جانب سے اغوا کیے گئے ایم ٹی آنر 25 نامی آئل ٹینکر کے پاکستانی قیدیوں کی صورت حال سے آگاہ کیا۔
ترجمان بلاول ہاؤس کے مطابق پاکستان پیپلز پارٹی کے چیئرمین بلاول بھٹو زرداری سے رکن قومی اسمبلی قادر پٹیل نے بلاول ہاؤس میں ملاقات کی۔
اس ملاقات میں رکن قومی اسمبلی نے بریفنگ دیتے ہوئے بتایا کہ بحری قزاقوں کی جانب سے اغواء کیے گئے ایم ٹی آنر 25 نامی آئل ٹینکر کے 17 رکنی عملے میں 10 پاکستانی شہری ہیں جن میں سے 6 کا تعلق کراچی اور دیگر کا سوات، باجوڑ، ساہیوال اور مردان سے ہے۔
قادر پٹیل نے بتایا کہ بحری قزاق عملے پر تشدد کر رہے ہیں جبکہ عملے کو خوراک کی بھی قلت کا سامنا ہے۔ انڈونیشیا اپنے ملک کے 7 شہری رہا کروانے کے لیے بحری قزاقوں سے رابطے میں ہے۔
اس موقع پر چیئرمین پیپلز پارٹی بلاول بھٹو زرداری کا کہنا تھا کہ بحری قزاقوں کی قید میں پاکستانی شہریوں کو تنہا نہیں چھوڑیں گے۔
انہوں نے ہدایت کی کہ وزارت خارجہ کے حکام، ڈائریکٹر جنرل فارن افیئرز بحری قزاقوں سے پاکستانی شہری رہا کروانے کے لیے اقدامات کریں۔
