امریکا اور اسرائیل کے ایرانی بندر امام پیٹروکیمیکل کمپلیکس پر بمباری کے وقت کئی ملازمین آخری لمحات تک ڈیوٹی سر انجام دیتے رہے، نئی سی سی ٹی وی ویڈیو سامنے آگئی۔
ایرانی میڈیا کی جانب سے جاری کی گئی نئی سی سی ٹی وی فوٹیج میں دیکھا جا سکتا ہے کہ شدید امریکی اسرائیلی بمباری کے باوجود کئی بہادر ملازمین آخری لمحوں تک اپنی ڈیوٹی پر ڈٹے رہے۔
خیال رہے کہ ایران میں امریکا اور اسرائیل کی جانب سے اہم پیٹروکیمیکل کمپلیکس کو 4 اپریل کو نشانہ بنایا گیا تھا۔
فوٹیج میں ظاہر ہوتا ہے کہ حملوں کے دوران بھی کارکنان پلانٹ کے اہم حصوں کو سنبھالنے اور ممکنہ نقصان کو کم سے کم رکھنے کی کوشش کرتے رہے۔ خطرناک صورتحال کے باوجود انہوں نے اپنی ذمہ داریاں ترک نہیں کیں اور آخری وقت تک اپنی جگہ موجود رہے۔
رپورٹس کے مطابق یہ واقعہ ایسے وقت میں پیش آیا جب علاقے میں شدید فضائی حملے جاری تھے، جس کے باعث صنعتی تنصیبات کو بھی خطرات لاحق تھے۔ ویڈیو منظرِ عام پر آنے کے بعد سوشل میڈیا پر ان کارکنوں کی ہمت اور پیشہ ورانہ ذمہ داری کو سراہا جا رہا ہے۔
فضائی حملوں کے بعد ایران کے سب سے بڑے پیٹروکیمیکل صنعتی مرکز کی پیداوار مکمل طور پر معطل ہو گئی تھی، حملوں میں دو اہم یوٹیلٹی پلانٹس کو نشانہ بنایا گیا تھا، جو اس بڑے صنعتی کمپلیکس کے اندر قائم 50 سے زائد فیکٹریوں کو گیس، بجلی اور صنعتی پانی فراہم کرتے تھے۔
ایرانی حکام کے مطابق یہ کمپلیکس ملک کے بڑے صنعتی مراکز میں شامل ہے، جہاں سالانہ تقریباً 72 ملین ٹن پیٹروکیمیکل مصنوعات تیار کی جاتی ہیں۔ یہ تنصیبات ماہشہر اور بندر امام خمینی کے قریب واقع ہیں اور علاقے کے تقریباً 3 لاکھ افراد کے روزگار کا بڑا ذریعہ ہیں۔ یہاں تیار ہونے والی مصنوعات میں بنیادی کیمیکلز، پولیمرز، پلاسٹک، ٹیکسٹائل، کھاد اور طبی سامان میں استعمال ہونے والا مواد شامل ہے۔
