چارسدہ میں نامعلوم افراد کی فائرنگ سے جے یو آئی کے سابق ایم پی اے مولانا محمد ادریس جاں بحق اور سیکیورٹی پر مامور 2 پولیس اہل کار زخمی ہو گئے۔
تفتیشی حکام کا کہنا ہے کہ واردات میں ملوث چار میں سے ایک دہشت گرد کی شناخت ہوگئی، دہشتگرد کا تعلق افغانستان سے ہے۔
حکام کا کہنا ہے کہ جس دہشتگرد کی شناخت ہوئی اس سے مکمل نیٹ ورک کا سراغ لگایا جا رہا ہے، ابتدائی تفتیش کے مطابق منصوبہ بندی افغانستان میں ہوئی۔
اس سے پہلے مولانا ادریس کے قتل کی ایف آئی آر تھانہ سی ٹی ڈی مردان میں درج کرلی گئی، ایف آئی آر کانسٹیبل شیر عالم کی مدعیت میں درج کی گئی۔
پولیس کا کہنا ہے کہ ایف آئی آر میں نامعلوم ملزمان نامزد، قتل کے ساتھ دہشت گردی کی دفعات شامل کی گئی ہیں، گاڑی میں مولانا ادریس، 2 پولیس اہلکار اور ڈرائیور تھے۔
ایف آئی آر کے مطابق ملزمان نے گاڑی پر پیچھے سے فائرنگ کردی، فائرنگ سے مولانا ادریس شہید اور 2 پولیس اہلکار زخمی ہوئے تھے۔
