اداکارہ، گلوکارہ اور میزبان فضا علی ایک بار پھر سوشل میڈیا پر تنقید کی زد میں آ گئی ہیں، جہاں ان کے حالیہ یومِ مزدور کے خصوصی شو کو متنازع قرار دیا جا رہا ہے۔
رپورٹس کے مطابق فضا علی نے یکم مئی (یوم مزدور) کے موقع پر مزدوروں کو اپنے پروگرام میں مدعو کیا اور ان کے ساتھ ایک خصوصی ریِل بھی شوٹ کی، ویڈیو میں وہ ہاتھ میں بیلچہ لیے مزدوروں کے ساتھ نظر آئیں اور ان کی خدمات کو سراہنے کا پیغام دیا۔
تاہم سوشل میڈیا صارفین کی ایک بڑی تعداد نے اس اقدام کو تنقید کا نشانہ بنایا۔
صارفین کا کہنا ہے کہ یہ سب محض ویوز اور ریٹنگز حاصل کرنے کے لیے کیا گیا ہے، ایک صارف نے تبصرہ کیا کہ مہمانوں کو عام لوگوں کی طرح پیش کرنا چاہیے تھا، نا کہ اس انداز میں جبکہ ایک اور نے لکھا کہ اگر خلوص کے ساتھ مزدوروں کی قدر کی جاتی تو زیادہ بہتر ہوتا۔
کچھ صارفین نے طنزیہ انداز میں کہا کہ کانٹینٹ بنانے کا فن شاید صرف فضا علی ہی جانتی ہیں، جبکہ دیگر کا مؤقف تھا کہ ایسے مواقع پر حقیقی احترام دکھانا زیادہ اہم ہے نا کہ اسے محض سوشل میڈیا کے لیے استعمال کیا جائے۔
دوسری جانب فضا علی کی جانب سے اس تنقید پر تاحال کوئی باضابطہ ردعمل سامنے نہیں آیا ہے۔
