بھارتی اداکار گووندا کی اہلیہ سنیتا آہوجا نے اپنی 40 سالہ شادی کے بارے میں کُھل کر بات کرتے ہوئے کہا ہے کہ گووندا ایک اچھے بیٹے اور والد تو ہیں مگر بطور شوہر وہ میری توقعات پر پورا نہیں اتر سکے۔
ایک حالیہ انٹرویو میں سنیتا نے بتایا کہ میں زندگی میں گھومنا پھرنا، تقریبات اور چھٹیوں پر جانا پسند کرتی تھی مگر گووندا ہمیشہ خاندان کی ذمے داریوں میں مصروف رہے اور میں اپنی زندگی سے لطف اندوز نہیں ہو سکی۔
اُنہوں نے افسوس کا اظہار کرتے ہوئے کہا کہ اتنے بڑے اداکار ہونے کے باوجود گووندا نے بھی زندگی کو بھرپور انداز میں نہیں جیا۔
اداکار کی اہلیہ کا کہنا ہے کہ میں ہمیشہ کہتی ہوں کہ مجھے گووندا جیسا بیٹا چاہیے تھا، شوہر نہیں، اب 40 سال گزر چکے ہیں، اس رشتے کو چھوڑنے کا سوچنا بھی ممکن نہیں۔
واضح رہے کہ گزشتہ ایک سال سے گووندا اور سنیتا کی ازدواجی زندگی خبروں میں ہے۔
یہ معاملہ اس وقت زیادہ سنگین ہو گیا تھا جب سنیتا نے گووندا پر دھوکا دینے اور کسی اور کے ساتھ رومانوی تعلق میں ہونے کا الزام لگایا تھا۔
اس پر ردِعمل دیتے ہوئے گووندا نے ان الزامات کو ایک سازش قرار دیتے ہوئے مسترد کر دیا تھا۔
یاد رہے کہ گووندا اور سنیتا کی شادی 1986ء میں ہوئی تھی، اس جوڑی کے دو بچے بیٹی ٹینا اور بیٹا یش وردھن ہیں جو جلد فلمی دنیا میں قدم رکھنے کی تیاری کر رہے ہیں۔
