اسلام آباد ہائی کورٹ نے یوٹیوبر رجب بٹ کا نام پاسپورٹ کنٹرول لسٹ (پی سی ایل) سے فوری طور پر نکالنے کا حکم دے دیا۔
جسٹس اعظم خان کی جانب سے جاری کیے گئے 6 صفحات پر مشتمل فیصلے میں متعلقہ اداروں کو ہدایت کی گئی ہے کہ اگر کوئی اور قانونی رکاوٹ یا کسی مجاز عدالت کا حکم موجود نہیں تو درخواست گزار کا نام فوری خارج کیا جائے۔
فیصلے میں کہا گیا ہے کہ پاسپورٹ کنٹرول لسٹ میں نام شامل کرنے کا اختیار لامحدود نہیں اور اسے منصفانہ اور قانونی طریقے سے استعمال کیا جانا چاہیے۔
عدالت نے قرار دیا ہے کہ کسی فرد کا نام پی سی ایل میں شامل کرنے سے اس کے آزادانہ نقل و حرکت کے بنیادی حق پر اثر پڑتا ہے، اس لیے ایسی پابندی کے لیے ٹھوس وجوہات ہونا ضروری ہیں۔
فیصلے کے مطابق پی سی ایل میں نام رکھنے کا مقصد صرف یہ ہوتا ہے کہ متعلقہ فرد کی تفتیشی اداروں یا عدالت میں حاضری یقینی بنائی جا سکے اور جب یہ مقصد حاصل ہو جائے تو پابندی برقرار رکھنا غیر ضروری ہو جاتا ہے۔
