پنجاب اسمبلی اجلاس میں ڈپٹی اسپیکر اقبال چنڑ اور حکومتی رکن احسن رضا میں تلخ جملوں کا تبادلہ ہوگیا۔
حکومتی رکن احسن رضا نے نقطہ اعتراض پر بات کی اجازت نہ ملنے پر غصے کا اظہار کیا تو ڈپٹی اسپیکر نے انہیں پنجاب اسمبلی کے ایوان سے باہر نکال دیا۔
ظہیر اقبال چنڑ نے اس موقع پر کہا کہ احسن رضا آپ نے صوبائی اسمبلی کو مچھلی بازار بنالیا ہے، یہ پنجاب اسمبلی ہے، کوئی جلسہ تھوڑی ہے، نقطہ اعتراض پر بات کی اجازت نہیں دوں گا۔
ڈپٹی اسپیکر نے مزید کہا کہ جس کا دل چاہتا ہے اٹھ کر وزیر یا پارلیمانی سیکرٹری کی تذلیل شروع کر دیتا ہے، اس کی کسی کو اجازت نہیں دوں گا۔
حکومتی رکن نے کہا کہ پارلیمانی سیکریٹری ہاؤس میں غلط بیانی سے کام لے رہے ہیں، مجھے باہر نکالنے والے آپ کون ہوتے ہیں؟
اس پر ڈپٹی اسپیکر نے احسن رضا کو جواب دیا کہ آپ کون ہوتے ہیں مجھے سمجھانے والے؟ ان کو ایوان سے باہر کریں، جس پر وہ باہر چلے گئے۔
