اداکار اور سیاست دان روی کشن نے اپنے وائرل ہونے والے جملے ’’ہوم فرام ورک‘‘ کی غلطی پر خاموشی توڑ دی اور کہا کہ آپ لوگ مجھے وائرل کیوں کرتے ہو؟
روی کشن جانتے ہیں کہ انٹرنیٹ کو ’’ہوم فرام ورک‘‘ کی صورت میں اپنا نیا پسندیدہ جملہ مل گیا ہے، انہوں نے آخر کار اپنی زبان پھسلنے پر بننے والے میمز کے طوفان پر ردعمل دے دیا۔
یہ جملہ اس وقت ٹرینڈ کرنے لگا تھا جب روی کشن نے وزیر اعظم نریندر مودی کی ایندھن بچانے کی اپیل کے بارے میں بات کرتے ہوئے غلطی سے ’’ورک فرام ہوم‘‘ کی جگہ ’’ہوم فرام ورک‘‘ کہہ دیا تھا، جس نے سوشل میڈیا صارفین کو ہنسنے پر مجبور کر دیا۔
فلم ’ماں بہن‘ کے ٹریلر لانچ کی تقریب میں روی کشن نے اپنے مخصوص ڈرامائی انداز میں اس وائرل لمحے کا ذکر کیا۔ اداکار نے کہا کہ وہ واقعی نہیں جانتے کہ یہ جملہ انٹرنیٹ پر اتنی بڑی بحث کا موضوع کیوں بن گیا۔
انہوں نے کہا کہ مجھے نہیں معلوم میں نے ’ہوم فرام ورک‘ بولا تھا۔ میں جلدی میں پارلیمنٹ جا رہا تھا۔ ’ورک فرام ہوم‘ بولنا تھا، نکل جاتا ہے، آخر میں بھی انسان ہوں۔
روی کشن جو اپنے بات کرنے کے رنگین انداز کی وجہ سے اکثر میمز کا نشانہ بنتے رہتے ہیں، اپنی زبان پھسلنے پر انٹرنیٹ کی اس دیوانگی سے محظوظ اور تھوڑے حیران دکھائی دیے۔ اس سے قبل ان کا جملہ ’’jaldi the late‘‘ بھی وائرل ہوا تھا، جس کے بعد اب ’’ہوم فرام ورک‘‘ تازہ ترین میم بن چکا ہے۔
اس توجہ پر ردعمل دیتے ہوئے روی نے کہا کہ غلطی کرتا ہوں تو آپ لوگ وائرل کیوں کرتے ہو؟ مجھ سے سب لوگ پوچھتے ہیں۔ میں نام نہیں لوں گا۔ میرے سینئرز مجھ سے پوچھتے ہیں، آپ کرتے کیا ہو؟
اس کے بعد انہوں نے مذاقاً اس میم کی لہر کو اپنی آنے والی نیٹ فلکس فلم ’ماں بہن‘ سے جوڑتے ہوئے کہا کہ یہ فلم بھی وائرل ہونے والی ہے۔
نیٹ فلکس کی آنے والی کرائم کامیڈی فلم ’ماں بہن‘ میں مادھوری ڈکشٹ، ترپتی دمری، دھرنا درگا اور روی کشن شامل ہیں۔ جو 4 جون کو ریلیز کی جائے گی۔
