پاکستان بزنس فورم (پی بی ایف) نے آئندہ مالی سال 27-2026ء کے بجٹ کے لیے وزارتِ خزانہ کو اپنی تجاویز ارسال کر دیں۔
پی بی ایف کے صدر خواجہ محبوب الرحمٰن کا کہنا ہے کہ حکومت آئندہ بجٹ میں معیشت کو گروتھ کی راہ پر ڈالنے کے لیے واضح سمت کا تعین کرے کیونکہ موجودہ حالات میں بزنس کمیونٹی مایوسی کا شکار ہے۔
اُنہوں نے مطالبہ کیا ہے کہ بجٹ میں سپر ٹیکس کو ختم کیا جائے جو ابتداء میں عارضی بنیادوں پر نافذ کیا گیا تھا مگر اب اسے مستقل شکل دے دی گئی ہے۔
پی بی ایف نے کاروباری لاگت کم کرنے کے لیے خصوصی اقدامات اور کارپوریٹ ٹیکس میں بتدریج کمی کی تجویز بھی دی ہے تاکہ سرمایہ کاری کو فروغ مل سکے۔
مزید برآں فورم نے فنانس بل سے سیکشن 37AA، 37B، 14AC اور 14AD کو ختم کرنے کا مطالبہ کیا ہے۔
ٹیکس نیٹ بڑھانے کے لیے پی بی ایف نے تاجروں پر ماہانہ 10 ہزار روپے فکس ٹیکس عائد کرنے کی تجویز دی ہے جس کے بعد انہیں مزید پوچھ گچھ سے مستثنیٰ رکھا جائے۔
اس فکس ٹیکس کو بجلی کے بلوں میں شامل کرنے کی بھی سفارش کی گئی ہے۔
ٹیکسٹائل کی برآمدات کے فروغ کے لیے مقامی کاٹن سیڈ اور آئل کیک پر سیلز ٹیکس ختم کرنے کی تجویز بھی بجٹ سفارشات میں شامل ہے۔
