امیرِ جماعتِ اسلامی پاکستان حافظ نعیم الرحمٰن نے اعلان کیا ہے کہ عیدالاضحیٰ کے بعد وکلاء کے ساتھ مل کر عوامی مسائل کے حل کے لیے تحریک شروع کی جائے گی، وکلاء سے اپیل ہے کہ وہ آگے بڑھیں اور جماعتِ اسلامی کا ساتھ دیں۔
رحیم یار خان میں وکلاء سے خطاب کرتے ہوئے حافظ نعیم الرحمٰن نے کہا کہ ملک میں غریب کی جیب پر ڈاکہ ڈال کر اشرافیہ کا نظام چلایا جا رہا ہے جبکہ قربانیوں کے باوجود عدلیہ اپنا مؤثر کردار ادا کرنے میں ناکام رہی ہے۔
اُنہوں نے کہا کہ نعرے، سیاسی جماعتیں اور چہرے بدلتے رہے لیکن نظام وہی پرانا اور فرسودہ ہے۔
حافظ نعیم الرحمٰن نے واضح کیا کہ جماعتِ اسلامی کسی ذاتی مفادات پر مبنی سیاسی اتحاد کا حصہ نہیں بنے گی۔
ان کا یہ بھی کہنا ہے کہ بعض عناصر نے امریکا اور ایران کے تنازع پر اپنے مفادات کی دکان چمکائی جبکہ جماعتِ اسلامی 100 فیصد ایران کے ساتھ ہے۔
