انڈین پریمیئر لیگ کے سابق چیئرمین للت مودی نے بھارتی کرکٹ بورڈ کو سخت تنقید کا نشانہ بناتے ہوئے کہا ہے کہ مصروف شیڈول کے باعث کھلاڑیوں کو حد سے زیادہ دباؤ کا سامنا ہے اور ان کی صحت کو نظر انداز کیا جا رہا ہے۔
بھارتی میڈیا کی رپورٹس کے مطابق ٹیم کے کوچ گوتم گمبھیر بھی آئندہ افغانستان کے خلاف ٹیسٹ میچ سے قبل کھلاڑیوں کے مصروف شیڈول پر ناخوش ہیں، کئی کھلاڑی 31 مئی کو لیگ کا فائنل کھیلنے کے بعد صرف چند دنوں میں 6 جون کو ٹیسٹ میچ کے لیے دستیاب ہوں گے جس سے تیاری کا وقت کم ہو جائے گا۔
للت مودی نے کہا ہے کہ ایسی صورتِ حال میں بورڈ کو کھلاڑیوں کو آرام دینا چاہیے کیونکہ انہیں خاندان کے ساتھ وقت گزارنے اور ذہنی سکون کی بھی ضرورت ہوتی ہے۔
ان کا کہنا ہے کہ مالی فائدے کے بجائے کھلاڑیوں کی صحت اور فلاح کو ترجیح دی جانی چاہیے۔
دوسری جانب ٹیسٹ فارمیٹ کے کپتان شبھمن گل نے بھی مطالبہ کیا ہے کہ کسی بھی ٹیسٹ سیریز سے قبل کم از کم 2 ہفتے کی تیاری کا وقت دیا جانا چاہیے تاکہ ٹیم بہتر کارکردگی دکھا سکے۔
