وزیر مملکت برائے اوورسیز پاکستانی و انسانی وسائل عون چودھری نے کہا ہے کہ پاکستان میں سول اور ملٹری ہم آہنگی اور ایک پیچ کے نتائج ہمارے سامنے ہیں۔
لندن میں میڈیا سے گفتگو کرتے ہوئے انہوں نے کہا کہ دنیا بھر میں جو اس وقت پاکستان کی عزت ہے وہ اسی انڈر اسٹینڈنگ کی وجہ سے ہے، فیلڈ مارشل اور وزیراعظم کی پارٹنر شپ پاکستان کو مزید ترقی دے گی۔ آنے والے وقت میں آپ اور اچھی خبریں سنیں گے۔
عون چودھری کا کہنا تھا کہ ایسی اصلاحات کر رہے ہیں کہ ایک مثالی پاکستان بن کر سامنے آئے، ثالثی کرا کر پاکستان نے دنیا میں ایک پر امن ملک ہونے کا پیغام دیا ہے۔
انہوں نے کہا کہ پاکستان نے امن کیلئے بھرپور کوشش کی، جس کا خصوصی سہرا وزیراعظم اور فیلڈ مارشل کو جاتا ہے، خدا کرے کہ پاکستان کی کاوشوں کے سبب امن قائم ہو اور پوری دنیا میں امن کا پیغام جائے۔
وزیر مملکت برائے اوورسیز پاکستانی کا کہنا تھا کہ شہباز شریف تمام اوورسیز پاکستانیوں کے بھی وزیراعظم ہیں، جولائی میں لندن میں روڈ شو منعقد کریں گے جس میں اوورسیز پاکستانیوں کو سرمایہ کاری کی سہولتوں کے بارے میں آگاہ کیا جاسکے۔
عون چودھری کا مزید کہنا تھا کہ پاکستان میں رئیل اسٹیٹ سمیت متعدد شعبوں میں سرمایہ کاری کے مواقع موجود ہیں۔
