عالمی یومِ مزدور کے موقع پر مقررین نے کہا ہے کہ 2015 میں کراچی کی جان لیوا گرمی میں سرکاری اعداد و شمار کے مطابق 300 ہلاکتیں ہوئیں لیکن ایدھی فاؤنڈیشن کے مطابق ہلاکتوں کی تعداد 5 ہزار سے زائد تھی، ان میں اکثریت مزدور طبقے کے لوگوں کی تھی۔
پاکستان انسٹی ٹیوٹ آف لیبر ایجوکیشن اینڈ ریسرچ (پائیلر) کے زیر انتظام عالمی یومِ مزدور کے موقع پر ’’ماحولیاتی تبدیلی اور مزدوروں کے حقوق‘‘ کے عنوان سے سیمینار میں اظہارِ خیال کرتے ہوئے مقررین کا کہنا تھا کہ پاکستان کا محنت کش طبقہ ماحولیاتی تبدیلی کی بھاری قیمت برداشت کر رہا ہے جبکہ محنت کش طبقے کا ماحولیاتی تبدیلی میں کوئی کردار نہیں۔
مقررین کا کہنا تھاکہ ولیکا اسپتال میں 78 نوزائیدہ بچوں میں ایڈز کی تشخیص ایک ہولناک واقعہ ہے، جس کی فوری اور غیر جانبدارانہ تحقیقات ہونی چاہیے۔
مقررین نے کہا کہ 2 کروڑ 60 لاکھ بچے اسکولوں سے باہر ہیں جن کی اکثریت مزدوروں کے بچوں پر مشتمل ہے۔
