وفاقی وزیرِ داخلہ محسن نقوی نے کہا ہے کہ مصر کے ساتھ تعلقات کو مضبوط بنانے کے لیے عملی اقدامات کیے جائیں گے۔
وزیرِ داخلہ محسن نقوی سے میجر جنرل مجدی ہلال کی قیادت میں مصری وزارتِ داخلہ کے وفد نے ملاقات کی۔
وزیرِ مملکت برائے داخلہ طلال چوہدری، بریگیڈیئر عصام ابو الخیر، بریگیڈیئر انجینئر محمد راضی اور بریگیڈیئر ڈاکٹر محمد منیر بھی ملاقات میں موجود تھے۔
ملاقات میں دونوں ممالک کی وزارتِ داخلہ کے درمیان تعاون بڑھانے پر اتفاق ہوا جبکہ سیکیورٹی، انسدادِ دہشت گردی، انسدادِ منشیات، سائبر کرائم اور سیف سٹی کے شعبوں میں اشتراک کو فروغ دینے پر تبادلۂ خیال ہوا۔
اس موقع پر نیشنل پولیس اکیڈمی اور مصر کی پولیس اکیڈمی کے درمیان افسران کی مشترکہ ٹریننگ کے لیے تعاون بڑھانے کا فیصلہ کیا گیا۔
وزیرِ داخلہ محسن نقوی نے کہا کہ مصری وفد کا دورہ دو طرفہ تعاون کی نئی راہیں تلاش کرنے میں معاون ثابت ہو گا۔
انہوں نے کہا کہ دونوں ممالک کی وزارتِ داخلہ کے مابین تعاون کے فروغ سے دو طرفہ تعلقات مستحکم ہوں گے۔
وفاقی وزیرِ داخلہ کا کہنا ہے کہ مشترکہ مفادات کے شعبوں میں تعاون کے نئے مواقع تلاش کرنے کے لیے پاکستانی وفد جلد مصر کا دورہ کرے گا۔
محسن نقوی نے یہ بھی کہا کہ دونوں ممالک کی وزارتِ داخلہ کے مابین تعاون کے فروغ سے دو طرفہ تعلقات مستحکم ہوں گے۔
