اداکارہ کیرتی سریش نے انسٹاگرام پر ایک ویڈیو شیئر کرتے ہوئے اپنے فلمی کیریئر کے دوران باڈی شیمنگ اور سرجری کی افواہوں پر پھٹ پڑیں۔
انہوں نے کہا کہ جب وہ ذرا موٹاپے کی جانب تھیں تو لوگ چاہتے تھے کہ وہ فٹ ہوں اور اب جب وہ فٹ ہیں تو لوگ کہتے ہیں کہ انہیں پہلے والا انداز پسند تھا۔
سرجری کی افواہوں کی وضاحت
کیرتی نے بتایا کہ 2013 میں جب انہوں نے اداکاری شروع کی تو وہ جم کو نظر انداز کرتی تھیں۔ لیکن 2018 میں فلم مہانتی کے بعد انہوں نے فٹنس پر کام شروع کیا اور 9 ماہ میں 10 کلو وزن کم کیا۔
ان کا کہنا تھا کہ اس کے باوجود لوگوں نے مجھے ’’کمزور‘‘ کہا اور سرجری کے الزامات لگائے۔
اداکارہ کا کہنا تھا کہ میں نے ہمیشہ قدرتی طریقے اپنائے ہیں، حتیٰ کہ چہرے کے لیے بھی۔ یہ سن کر دکھ ہوا کہ میری محنت کو سرجری سے جوڑا گیا۔
کیرتی نے کہا، ’’جب آپ موٹے ہوتے ہیں تو لوگ چاہتے ہیں کہ آپ فٹ ہوں، اور جب آپ فٹ ہو جاتے ہیں تو وہ کہتے ہیں کہ آپ پہلے اچھے لگتے تھے۔ یہ دنیا کیسے کام کرتی ہے، کبھی کبھی حیرت ہوتی ہے۔‘‘
اداکارہ نے اعتراف کیا کہ حال ہی میں انہیں جسمانی اور ذہنی مشکلات کا سامنا رہا، لیکن انہوں نے کہا کہ وہ ہار نہیں مانیں گی۔ ان کا کہنا تھا کہ اگر کبھی رکنا پڑے یا توقف کرنا پڑے تو کروں گی، لیکن کبھی ہار نہیں مانوں گی۔
