وفاقی وزیر اطلاعات و نشریات عطا تارڑ نے کہا ہے کہ ہم صحافیوں اور میڈیا ورکرز کی کاوشوں کو قدر کی نگاہ سے دیکھتے ہیں۔
اسلام آباد سے جاری بیان میں وفاقی وزیر نے کہا کہ عالمی یوم آزادی صحافت پر پاکستان میں آزاد اور متحرک میڈیا کے لیے اپنے عزم کا اعادہ کرتے ہیں۔
انہوں نے کہا کہ پاکستانی میڈیا طویل عرصے سے عوامی اعتماد اور جمہوری اقدار کے مضبوط ستون کے طور پر کھڑا ہے، ہم صحافیوں اور میڈیا ورکرز کی کاوشوں کو قدر کی نگاہ سے دیکھتے ہیں۔
عطا تارڑ نے مزید کہا کہ معرکہ حق کے دوران پاکستانی میڈیا نے ذمے دارانہ اور حب الوطنی پر مبنی کردار ادا کیا۔
اُن کا کہنا تھا کہ پاکستانی میڈیا بتدریج ماڈرن ٹولز اور گلوبل کنیکٹویٹی سے ہم آہنگ ہو رہا ہے، ڈیجیٹل پلیٹ فارمز پاکستان کی حقیقی تصویر اور صلاحیت اُجاگر کرنے میں مدد دے رہے ہیں۔
وفاقی وزیر اطلاعات نے یہ بھی کہا کہ پاکستان میں میڈیا کی آزادی، ذمہ داری اور تمام میڈیا کے روشن مستقبل کےلیے پُرعزم ہیں۔
