وزیراعظم نے فضلے سے توانائی کی پیداوار کے حوالے سے ٹاسک فورس بنانے کی منظوری دے دی۔ جو ویسٹ ٹو انرجی کے موجودہ فریم ورک کا جائزہ لیکر نئی قومی پالیسی بنانے پر کام کرے گی۔
وزیراعظم آفس کے اعلامیہ کے مطابق وفاقی وزیر پاور ڈویژن اویس لغاری ٹاسک فورس کے کنوینر ہوں گے جبکہ ٹاسک فورس میں وفاقی وزیر مصدق ملک، وزیر مملکت بلال اظہر کیانی، سیکریٹری موسمیاتی تبدیلی، سیکرٹری بین الصوبائی رابطہ اور چاروں صوبوں، گلگت بلتستان اور آزاد کشمیر کے لوکل گورنمنٹ، موسمیاتی تبدیلی اور توانائی کے سیکریٹریز بھی شامل ہوں گے۔
وزیراعظم آفس کے اعلامیہ کے مطابق ٹاسک فورس میں نجی شعبے سے متعلقہ افراد کو بطور ممبران شامل کیا گیا ہے۔
اعلامیہ کے مطابق ٹاسک فورس پاکستان میں فضلہ سے توانائی پیدا کرنے کے موجودہ فریم ورک کا جائزہ لے گی، ٹاسک فورس قانونی، ریگولیٹری، مالی اور آپریشنل رکاوٹوں کی نشاندہی کرے گی اور ویسٹ ٹو انرجی کے بارے میں قانون سازی اور ریگولیٹری اصلاحات سمیت اقدامات تجویز کرے گی۔
ٹاسک فورس اس شعبے میں سرمایہ کاری اور رابطہ کاری سمیت دیگر اقدامات بھی تجویز کرے گی۔
