معروف ہالی ووڈ اداکارہ این ہیتھاوے ایک بار پھر خبروں کی زینت بن گئیں، مگر اس بار کسی فلم کے باعث نہیں بلکہ اپنے ایک دلچسپ جملے کی وجہ سے وہ توجہ کا مرکز بنی ہیں۔
اپنے حالیہ انٹرویو میں ان کی ان شاء اللّٰہ کہنے کی ویڈیو سوشل میڈیا پر وائرل ہو گئی، اداکارہ نے یہ بات ایک میگزین کو دیے گئے ایک انٹرویو میں کہی، جہاں وہ عمر بڑھنے کے موضوع پر گفتگو کر رہی تھیں۔
انٹرویو کے دوران این ہیتھاوے نے کہا کہ عمر بڑھنے سے خوفزدہ نہیں ہونا چاہیے، انسان یا تو بڑھاپے سے ڈرتا ہے یا کم عمری میں مرنے سے اور میں ان شاء اللّٰہ ایک لمبی اور صحت مند زندگی گزارنا چاہتی ہوں۔
این ہیتھاوے نے اپنے کریئر میں دی پرنسز ڈائریز سے شہرت حاصل کی، اداکارہ کے اس جملے نے دنیا بھر کی توجہ اپنی جانب کھینچ لی ہے اور سوشل میڈیا صارفین نے اسے بے حد پسند کیا ہے۔
کئی صارفین نے دلچسپ تبصرے کیے، ایک نے لکھا کہ اب یہ ہماری سسٹر این ہیں، جبکہ دوسرے نے کہا کہ انہیں ان الفاظ کی طاقت کا علم ہے اور ایک اور صارف نے حیرت کا اظہار کرتے ہوئے کہا یہ کیا ہو رہا ہے، لیکن ان شاء اللّٰہ۔
این ہیتھاوے کا یہ انداز مداحوں کو خوب بھا رہا ہے اور ان کا یہ کلپ تیزی سے وائرل ہو رہا ہے۔
