میٹ ڈیمون اور بین ایفلک اپنی فلم ’’دی رِپ‘‘ کے باعث قانونی تنازع میں پھنس گئے ہیں۔
میڈیا رپورٹس کے مطابق میامی کے بعض پولیس افسران نے ان کی فلم کے خلاف ہتکِ عزت کا مقدمہ دائر کیا ہے، جس میں دعویٰ کیا گیا ہے کہ فلم میں پولیس اہلکاروں کو ’’غیرمنصفانہ‘‘ اور بدعنوان انداز میں پیش کیا گیا۔
فلم جنوری 2026 میں ریلیز ہوئی اور اس میں ڈیمون اور ایفلک نے میامی۔ڈیڈ پولیس ڈپارٹمنٹ کے نارکوٹکس یونٹ کے افسران کا کردار ادا کیا۔
کہانی 2016 کے حقیقی میامی لیکس منشیات چھاپے کی کارروائی پر مبنی ہے، جس میں حکام نے 20 ملین ڈالر سے زائد نقد رقم برآمد کی تھی، جو میامی۔ڈیڈ کی تاریخ میں ضبط کی جانے والی سب سے بڑی نقد رقم سمجھی جاتی ہے۔
رپورٹس کے مطابق اس کارروائی میں شامل کئی پولیس افسران نے بین ایفلک اور میٹ ڈیمون کے خلاف ان کی پروڈکشن کمپنی کے ذریعے مقدمہ دائر کر دیا ہے۔
افسران کا الزام ہے کہ فلم نے انہیں نقصان دہ اور غیرمنصفانہ انداز میں پیش کیا، اور ان کا کہنا ہے کہ اس تصویر کشی نے اس ہائی پروفائل چھاپے سے وابستہ افراد کی ساکھ کو متاثر کیا ہے۔
فلم کی ہدایت کاری جو کارناہن نے کی ہے، جبکہ کاسٹ میں اسکاٹ ایڈکن، ساشا کیل، ٹیانا ٹیلر، اسٹیون یوین اور کائل چینڈلر بھی شامل ہیں۔
