ماہرینِ صحت کے مطابق گہری سانس لینا ایک سادہ مگر مؤثر طریقہ ہے جو ناصرف ذہنی سکون فراہم کرتا ہے بلکہ مجموعی صحت کو بھی بہتر بناتا ہے۔
ایک رپورٹ کے مطابق یہ عمل جسم میں کئی مثبت تبدیلیاں لاتا ہے جس میں مدافعتی نظام کی مضبوطی اور نظامِ ہاضمہ کی بہتری شامل ہے۔
ماہرین کا کہنا ہے کہ گہری سانس لینے سے ذہنی دباؤ اور بے چینی میں کمی آتی ہے، جب انسان تناؤ کا شکار ہوتا ہے تو گہری سانس لینا پیراسیمپیتھٹک نروس سسٹم کو متحرک کرتا ہے، جو جسم کو پُرسکون بناتا ہے اور فائٹ یا فلائٹ ردِعمل کو کم کرتا ہے۔
اس عمل سے بلڈ پریشر کم ہوتا ہے، دل کی دھڑکن متوازن ہوتی ہے اور سکون کا احساس بڑھتا ہے۔
گہری سانس ذہنی صحت پر بھی مثبت اثر ڈالتی ہے، یہ ذہن کو آرام دیتی ہے اور توجہ میں اضافہ کرتی ہے، خاص طور پر ایسے وقت میں جب کام کا دباؤ زیادہ ہو یا انسان بے چینی محسوس کر رہا ہو۔
ماہرین کے مطابق یہ عمل مدافعتی نظام کو بھی مضبوط بناتا ہے اور سفید خون کے خلیات میں اضافہ کر سکتا ہے، جو جسم کو بیماریوں سے بچانے میں اہم کردار ادا کرتے ہیں۔
سانس کی بیماریوں میں مبتلا افراد کے لیے بھی یہ فائدہ مند ثابت ہو سکتی ہے، کیونکہ اس سے پھیپھڑے زیادہ پھیلتے ہیں اور آکسیجن کا حصول بہتر ہوتا ہے۔
اس کے علاوہ گہری سانس بہتر نیند میں بھی مددگار ہے، جو افراد نیند کے مسائل کا شکار ہیں، وہ سونے سے پہلے اس مشق کے ذریعے جسم کو پرسکون بنا سکتے ہیں۔
ماہرین کا مزید کہنا ہے کہ یہ عمل نظامِ ہاضمہ کو بھی بہتر بناتا ہے، کیونکہ تناؤ ہاضمے کو سست کر دیتا ہے جبکہ گہری سانس جسم کو آرام دے کر ہاضمے کے عمل کو بہتر کرتی ہے۔
گہری سانس لینے کے لیے ماہرین سادہ طریقہ تجویز کرتے ہیں، جیسے کہ آرام دہ حالت میں بیٹھیں یا لیٹ جائیں، کندھوں کو ڈھیلا رکھیں، ناک کے ذریعے آہستہ اور گہری سانس لیں، چند لمحے روکیں اور پھر منہ کے ذریعے آہستہ سانس خارج کر دیں، اس عمل کو چند منٹ تک دہرایا جا سکتا ہے۔
نوٹ: یہ مضمون قارئین کی معلومات کے لیے شائع کیا گیا ہے، صحت سے متعلق امور میں اپنے معالج کے مشورے پر عمل کریں۔
